Alþjóðanefnd sendi fimm fulltrúa á FINO 2015 sem haldin var í Bergen í Noregi helgina 5.-8. nóvember. Árný Jóhannesdóttir, Bjarni Rúnar Jónasson, Einar Friðriksson, Hannes Halldórsson og Herdís Hergeirsdóttir fóru á vegum nefndarinnar en auk þeirra var formaður FL, Sæmundur Rögnvaldsson, með í för. FINO er árleg ráðstefna Norrænna læknanema þar sem þeim gefast tækifæri til að koma saman og ræða heilbrigðistengd málefni. Norðurlöndin skiptast á að halda ráðstefnuna, Ísland hélt hana í fyrra og þá er komið að Finnlandi á næsta ári.

Þema ráðstefnunnar í ár var “sjálfbær þróunarmarkmið og sjálfbær heilbrigðisþjónusta, hvernig getum við tryggt góða heilsu allra?”, og var rauði þráðurinn sjálfbær þróunarmarkmið Sameinuðu þjóðanna og hvort og þá hvað við sem læknanemar gætum gert til að leggja okkar af mörkum. Dagskráin var þéttpökkuð af fyrirlestrum og “workshop-um” og var ekki annað að sjá en að fólki væri mjög annt um þessi málefni en oftar en ekki sköpuðust miklar umræður. Sérstaklega átti það við um workshop sem snerist um nokkurs konar hlutverkaleik varðandi útdeilingu gæða og forgangsröðun í heilbrigðiskerfinu, en mörgum fannst það standa upp úr.

Á kvöldin var þó brugðið á leik og vann íslenska sendinefndin meðal annars verðlaun fyrir besta búninginn, þar sem þema kvöldsins var “faraldur”. Var þeim meðal annars
hrósað fyrir að hugsa út fyrir kassann og klæða sig upp sem offitufaraldurinn.

Allt í allt frábær og vel skipulögð ráðstefna hjá frændum okkar í Noregi, en líkt og áður sagði er röðin komin að Finnlandi á næsta ári og verður spennandi að sjá hvert þema þeirrar ráðstefnu verður.

– Alþjóðanefnd